La sozietà Park Urtijëi GmbH ie na sozietà dl Chemun che se cruzia dla strutures dla plaza dai auti Garage Central, dla strutura de tennis a Runcadic y dla plaza dai auti y dla curieres via n Setil.

Te chisc ultimi mënsc à la sozietà fat de plu lëures che jiva de bujën per miuré i servijes. Tla Garage Central ora la stazion iel unì fat l lëur de majera mpurtanza y plu avisa ie la ijulazion dl plafon, che ne staniova nia plu, unida fata da nuef. Chësc lëur ie unì fat dal Chemun y n à tëut l’ucajion de derturé y de abelì y de dé n miëur funziunamënt ala spersa dan la Cësa de paussa. N auter lëur che ie unì fat ie chël de fé a na maniera che chëi che lascia i auti posse adurvé sistems digitei per paië, perchël possen śën pra tramedoi casses paië cun chertes de credit. Chëi che à la cherta paieda danora possa furné ite y ora de garage se lascian tré ju la soma che ie da paië dal fonin y ne muessa a chësta maniera nia jì pra la cassa a paië. Per chël che reverda i priejes, priejes che fova n droa dal 2016, iel stat n aumënt de zirca 14%. Chël uel dì che lascé l auto n’ëura costa śën 1,80 euro. Tlo iel nce la puscibltà, paian na cauzion de 10 euro, de tò na cherta da ciarië su. Cun chësta cherta possen sté te garage debant la prima ëura y mesa. Dant fovel mé una n’ëura. Chël uel dì che lascé l auto nchin a doi ëura y mesa costa 1,80 euro.

L ie nce unì metù su tofles nueves y depënt sun fonz ulache la jënt à da jì a pe canche la va ite y ora de garage, dut per garantì na majera segurëza. N gran lëur che unirà tosc fat sarà chël de mudé ora l mplant de iluminazion cun lumes a led. Chësc jiva de bujën per n miëur linëus y per sparanië energia de n mplant che ie unì fat dan plu o manco 20 ani. Pra la ntreda dla garage uniral metù su tofles cun scritures iluminedes. Chësc per miuré la comunicazion a chëi dai auti che uel furné ite te garage. Coche scrit dant dala lege iel unì dat la ncëria de fé na plata web ulache l unirà metù ite d’uni sort de nfurmazions y i priejes dla Park Urtijëi. Nce tl fabricat da fé al tennis iel da fé plu lëures. Dantaldut iel unì dat a na firma la ncëria de valuté sce l frabicat curespuend mo ala normatives che vën damandedes al didancuei. Chësc ie de gran mpurtanza per pudëi mëter a jì manifestazions publiches. Ora de chël uniral fat da nuef l bani che ie scialdi melciafià.

Tla plaza da lascé i auti via n Setil saral d'autonn da fé da nuef duta la risses blances y da fé cumedures al asfalt.

Ajache l ann passà y nce ti prim mënsc de chëst ann à la Park Urtijëi per gauja dla pandemia trat ite scialdi de manco, ti à l Chemun, che ie l sëul cumëmber de chësta sozietà, dat n cuntribut de 170.000 euro ala sozietà. Nscila possa unì finanziei i nvestimënc che ie de bujën, nvestimënc per mantenì y miuré la trëi strutures che ie a despusizion di zitadins y di seniëures.