L parch sun la plaza dan la Cësa de paussa tla streda Stazion ie nuef y ie per duc, ajache l ne ie degun mpedimënc per stuei da rodes o bagli. L stravova sot ala Cësa de paussa tla garage Central y l univa ora tiera da n parëi. L’ega che univa ora dlaciova d’inviern. Perchël fovel gran ëura de cuncé l plafon y d’autra pertes dla garage y se nuzan dl’ucajion de cumedé nce la spersa sëuravia. N à ulù tò y tres i rëms sun plaza, acioche la jënt de tëmp posse jì a spaz tl parch y l’umans sburdlé i bagli. L cunzet per la plaza nueva à udù dant de la fé plu vërda, nsci che la jënt de tëmp, y nia mé, à la puscibltà de fé na raida zënza de majeri festidesc. N possa se senté y paussé o s’la ciaculé sun i banc nueves. La locomotiva ie unida valoriseda de plu sun l salejà fat da nuef, nce vel’ meter de scines ie unì juntà per lecurdé la storia: l semea belau che la ferata ulëssa inò pië via.