L presidënt ie Konrad Senoner y cunselieres ie Claudia Insam y Ewald Moroder  La sozietà Park Urtijëi G.m.b.H. à coche sëul cumëmber l Chemun de Urtijëi y l fin dla sozietà ie la gestion de trëi strutures.  L se trata dla plaza dai auti "Parkgarage Central", dla strutura dal tennis che ie a Runcadic y dla plazes dai auti y dla curieres via n Setil.  L presidänt Konrad Senoner se cruzia particularmënter dla garasc dai auti y dl personal, Ewald Moroder dl fabricat da jughé al tennis y Claudia Insam dla plaza dai auti y dala curieres via n Setil.    Per chël che reverda la Garage Central iel da dì che la ie dl Chemun y vën fiteda ala sozietà che muessa se cruzië dl personal, di lëures de manutenzion y de fé i nvestimënc che va de bujën.  Danter l’auter ie unides mudedes ora duta la vedla lumes cun de nueva lampes a LED.  N à sblanchejeda ora da nuef la garage y dan la ntreda iel n placat digitel che mostra mo tan de lueges che ie mo libres.  N à nce automatisà l sistem de paiamënt.  N po śën a la ntreda se fé giaurì la stangia cun na cherta de credit y canche n va ora pona metun inò via la cherta y la stangia se gëura.  L priesc che ie da paië vën trat ju automaticamënter dala cherta de credit.  A chësta maniera ne an nia plu drë de passé pra la cassa a paie.  De mpurtanza ie nce l nuef sistem de videocameres che porta pro a avëi n miëur cuntrol de dut chël che suzed te garage.  Plu de 60.000 auti se nuzea uni ann de chësta garasc ulache  doi dependënc  se cruzia de dut chël che ie da fé.  Per ti jì ancontra ala jënt dl luech tulan la Happy Hour Card parchejé l'auto per 90 menuc zënza messëi paië.  Chësta scumenciadiva dëssa purté pro che la garage vënie nuzeda deplù da chëi da tlo.

L frabicat per jughé a tennis a Runcadic ie dla Park Urtijëi y ti vën fità ala Lia dal Tennis de Urtijëi, che se cruzia dla gestion.  Danter l auter vëniel metù a jì turnoies de tennis a n bon livel y sambën dat la puscibltà de jughé a tennis y de tò ëures de scola cun n maester.  Te chësta strutura à nce si sënta n local da fitness y n studio de fisioterapia.  Leprò à la Grupa Arpizeda Sportiva Gherdëina ju bas na palestra per pudëi fé si atività.  Alalergia iel, ora dla plazes per jughé al tennis,  mo na plaza ulache n possa jughé a volleyball y pratiché l juech dl "paddle".  Nce te chësta strutura iel unì fat de plu miuramënc coche la porta de ntreda automatiseda y l ie unì mudà ora deplù vieresc.  Ma l proscimo gran lëur che sarà da fé ie chël de fé l tët da nuef che ie melciafià y n muessa cialé che dut sibe a norma per pudëi urganisé tl daunì manifestazions sportives y cultureles, per ejëmpl l'UNIKA y turnoies de tennis ma nce per garantì la segurëza de duc chëi che jughea a tennis.

La plaza dai auti via n Setil ie de puscion dla Lia per l turism y l Chemun à l dërt de spersa.  D'instà se cruzia la Park Urtijëi dla gestion dla plazes da lascé i auti y la curieres.  Ntan chisc mënsc iel la bela cumpëida de zirca10.000 auti y 1.000 curieres,  che se nuzea de chësta plaza dai auti.  D'inviern vën l areal fità via al Hockey Club Gherdëina,  che deberieda al chemun de Urtijëi se cruzia de mëter a jì la plaza dala dlacia,  ulache n possa jì cun i jadins y ulache i mutons possa jughé a hockey.  Nce per chësta strutura se cruzia la Park Urtijëi dla manutenzion. L'aministrazion de Chemun ie tl lëur de studië coche n pudëssa nuzé miec la plaza y ti dé n miëur cialé ora.     Coche n veisc iel trëi strutures che pieta n bon servisc ala populazion de Urtijëi y ai turisć.  L cunsëi dla Park Urtijëi cun l susteni dl Chemun se mpënia à aministré cun lezitënza y cëla de fé n bon lëur.